Oos Londen...hier kom ons

Hi julle,

My man word 40 Saterdag. Het baie gewroeg oor wat om vir hom te doen met sy 'big 40' Wou aanvanklik vir hom 'n bash hou by Greensleeves. Sou my iets soos R12000 gekos het vir al die mense. Nou dink ek by myself, wat kan ons nie net doen met daai tipe geld nie. Is seker selfsugtig, maar nou ja. En my reëling bly toe ook sommer nie eers meer my eie nie, want 'dierbare skoonsus', wat haar neus nie uit ander se sake kan uithou nie, en wat nie gelukkig is totdat sy iemand anders kan omkrap nie, besluit toe sommer sy neem die reëlings oor.

En sy laat val 4 keer iets hier oor die gedoente. Wat my gathare toe mos sommer lelik omkrap. Veral die dag toe sy my bel en sê sy is nou by die plek om die besprekings te boek. Wip ek toe mos my gat en vertel haar sy moet asb nie my reëlings oorvat nie. Intussen verjaar my seun, en ons hou vir hom partytjie. Sommer braai, met eetgoed ens. En ek beloer die familie uit 'n hoek. Ek begin toe wonder of is ek lus vir hulle gespys 2 keer in een maand.

Die idee van Greensleeves begin al hoe meer vervaag. Veral toe mense begin kerm oor kinders onder 10 nie daar mag ingaan nie. Toe besluit ek basta met die klomp. Ek wil hê my man moet sy verjaarsdag geniet. Ek beluit toe ek gaan iets anders doen. Ek wil hom op 'n vliegtuig laai en hom Oos Londen toe vlieg vir die naweek. Ons het daar verloof geraak, en die plek lê baie na aan ons harte.

Maar hoe nader die tyd kom, hoe meer afsprake maak my man vir werk. Onstandighede stel van die werk uit tot volgende week, en vanoggend dink ek dis great! Ek kan hom wegsmokkel vir die naweek. Alles is toe nog verrassing sien. Maar vanoggend bel klient en kla oor een of ander iets, en manlief sê dis reg, hy sal more soontoe kom. En ek besef net daar ek sal moet iets doen. Ek wil nie die surprise spoil nie, maar ek moes toe nou maar. Want sien, ek moet nog vliegkaartjies bespreek, en 'n kar om mee te ry en die lotte.

'Liefie' sê ek, 'ons 2 moet eers koukus'. 'En jy het nie 'n sê in die saak nie' vertel ek hom. 'ons 2 klim vanaand of more op die vliegtuig OL toe' en ek wag vir die teenkanting. Want ek was reg vir oorlog. Nou ja, ek het darem nie veel teenkanting gekry nie, en ons is toe netnou hier weg om die nodige besprekings te gaan doen. Terwyl ons by die agent is, sê ek vir hom, ons meisiekind het nog nooit gevlieg nie, wonder of sy nie bietjie hartseer gaan wees nie. Dis toe nou nie 'n probleem nie, want hy bespreek toe vir haar ook plek. Sy weet dit nog nie, maar ek dink sy gaan uit haar vel spring.

So nou is ons more middag op 1 Time (weet nie hoe is hulle diens nie, en die agent kan ons ook nie regtig inlig nie) OL toe. Ons kom eers weer maandag terug. Ek dink dit sal ons goed doen, en ek weet manlief sal dit meer geniet om op die seilskip te gaan seil, en 'n stuk vis by Vincent fisheries te gaan eet as die gefuif van klomp familielede, wat in elk geval dink hulle is beter as ander.

So julle mense moet 'n lekker naweek hê. Ek sal weer dinsdag seker nuwe posting kom doen, dan vertel ek julle van die naweek.

Liefde groete

Sonneblom