Hi almal,

Terug uit Oos Londen. Lekker verjaarsdag gehou. Lekker gekuier. 'n Vliegtuig is darem maar 'n lekker ding. Ons naweek was heel lekker. Kon glad nie swem nie, die water was piskoud. Weer was bietjie winderig, maar dis mos maar hoe dit is daar.

Meisiekind het toe vir die eerste keer gevlieg. Sy het dit baie geniet. Natuurlik die venster sitplek vir haarself geneem. En haar oë toegeknyp toe ons opstyg hier by JHB. Ons het met 1 Time gevlieg. Ek was maar benoud, wat dis maar klein, en die sitplekke is maar nou. Eerder dit as die mergelende 10 ure se ry soontoe. Vlug was maar 1uur en 15 minute. Ek wou natuurlik seker 6 keer oppad soontoe omkap in die vliegtuig. Seker maar die lugdruk of iets...ek weet nie. Manlief was net bekommerd die vliegtuig gaan val. For some reason het hy nie die ding vertrou nie. Seker omdat dit so klein vliegtuig is. Kry ook nie 'n drankie of kos op daai vliegtuig nie, alles moet gekoop word. Natuurlik ten duurste. Betaal vir 1 klein pakkie wine gums en 3 blikkies appletizer R48.00.

In Oos Londen aangekom moet ons eers die huur motor gaan kry. Kry toe 'n Nissan Tiida. Wat 'n lekker kar om mee te ry. Manlief is groot. En daar is nie baie van die klein karre wat hy gemaklik in kan sit nie. Nadat hy sy sitplek gestel het kyk ek of meisiekind gemaklik is agter. Sy sit agter manlief, en hoe verbaas was ek toe ek sien dit lyk of die kind verdwaal agter op daai sitplek. Al wat sy kon sê is dat ons ook so kar moet koop. (I wish) Die kattebak is klein, maar kruideniersware is so duur vandag dat mens nie meer 'n groot kattebak nodig het om te koop nie....hehehe.

Daar was 3 dinge wat ek graag wou gaan doen. 1 Om by Vincent Fisheries die lekkerste cafe vis te gaan koop - maar helaas, die eienaar is sometime in die laaste 8 jaar oorlede, en sy vis winkel ook. 2 Om by die enigste steers steakhouse in die land te gaan steak eet - ook het iets met die plek gebeur, want hy bestaan nie meer nie. En 3 om te gaan seil. Dis nou 'n ander storie. Op die dokke aangekom, besluit ons ons gaan sommer daar ontbyt eet. Manlief (Doom profeet) sê toe hy gaan not 'n hel op die skip uit nie. "The sea will claim his victims" - sy woorde. En hoe kan ek dit toe nou alleen gaan geniet. Hartjie nou nog seer oor dit. Maar die ontbyt was darem lekker en glad nie so duur nie.

Ons maar heel naweek rondgery, en al wat take aways is gekoop en verslind. Voel nou nog die nagevolge van al die ge eet. Paar keer op verskillende plekkies op die strand en tussen die klippe gaan rondloop. Skulpies opgetel, en 2 klippe. Die mooiste klip, perfek plat aan die onderkant en rond bo op, met die mooiste strepe. Manlief was net bekommerd dat iemand by die lughawe ons gaan keer met my klippe, maar saambring die wou ek, en ek wou na geen rede luister nie. Nou ja, klippe en skulpies het veilig gevlieg.

Ons het rondgery en na huise gaan kyk. As ons gedink het eiendom is duur hier in JHB dan is dit eintlik goedkoop hier. Iemand sê ons moet gaan kyk na die bargain. Mense soek R350 000 vir die huis. Dis in Wes Bank. Ons ry toe om te gaan kyk. Ek dink nie Hillbrow het sulke erge krotte nie. Mens sal die plek heeltemal tot op die vondasies moet afbreek en die huis oorbou. En om so klein stukkie grond in een van die swakker areas vir daai geld te koop, maak nie vir my sin nie. Maar reken hulle ons, dit bly 'n winskoop. I don't think so. Op Kidds Beach is daar nou nuwe ontwikkeling aan die gang. Mooi grond, waar mens die see kan sien vir dieselle prys. Maar dis nog alles sterk onder bespreking. Sal maar sien of ons daarby sal uitkom.

Ons stop by 'n huis met verkoopsbordjie op gister. Gaan klop, en hier maak ou tannie oop. Die vriendelikheid vanself. (Meeste mense daar is altyd vriendelik). Ons wil graag die huisie sien vra ons toe die tannie. Maar alte seker, en daar trek sy los en begin gesels. Wys ons die huis. Mooi stewige huis en pynlik netjies. En die tannie gesels. Van toeka tot nou. En daar moes ons nou eers koffie drink. Nou hou ek die tannie dop, met 'n glimlag so breed soos die Nyl rivier. Bewerig en al, kook sy wragies nog die melk. Dink by myself waar sien mens dit in die lewe. Dis die eerste koppie frisco koffie wat ek al ooit gedrink het wat na iets gesmaak het. So met die gesels kom ek agter maar die tannie hou daarvan om goetertjies te herhaal. So al asof sy vergeet sy het al daaroor gepraat. Toe die tannie ons vertel sy is 82 kon ek dit nie glo nie. Dis die mooiste 82 jarige tannie wat ek al ooit gesien het. Sy lyk nie 'n dag ouer as 70 nie. Toe verklaar dit die vergeetagtigheid. Lieflike ou mensie, met 'n glimlag van goud. Lekker gekuier by haar.

Oos Londen eis elke keer sy ietsie op as ons daar is. 9 Jaar gelede het my man 'n goue ketting om sy nek gehad. 'n Duur ketting. Ons het lekker baljaar in die see, en die golwe het mooitjies daai ketting van sy nek afgehaal. Nooit weer gesien nie. Ek was 1 jaar oud, toe kry ek 'n seëlring by my ouma. Die het te klein geword vir my vingertjie, en my ma het hom gebêre tot ek 16 was. Ek het 'n ander pand laat aansit en die ring op my pinkie gedra. Toe my kind 10 word gee ek toe vir haar die ringetjie. En daar verloor sy die ring sonder dat sy dit agtergekom het. Die ring is 37 jaar oud. Wonder of hy ooit sal uitkom.

Ander baie interresante ding wat ons opgemerk het daar, dit lyk nie asof daar 'crime' in daai plek is nie, want omtrent 75% van die huise het of glad nie of baie klein heinings om hulle erwe. En jy sien omtrent nie diefwering nie. Mens kan duidelik sien as die huis aan 'n Gautenger behoort. En dis baie swart daar.

Was half hartseer toe ons moes terugkom. En was benoud vir daai suigende gevoel in my brein op die vliegtuig. Maar alles het goed verloop. Vlug was lekker - nogsteeds beknop. En ons was toegerus met ons eie koeldrank en wine gums...hehehe. Ons het 15 minute vroër geland, so die 'pilot' het voet in die hoek gesit.

Vandag is alles terug na normaal. Skool, werk, en werk. Effe hoofpyn vanoggend, en natuurlik nie lus vir werk nie. Sal maar so op 'n trand aangaan hier. Ek mis al klaar die gebruis van die water. Eendag sal ons weer kom kuier OL.

Liefde groete

Sonneblom